Virusi ni viumbe wadogo wanaoambukiza ambao ni wadogo sana kuliko kuvu au bakteria. Lazima virusi wavamie seli hai ili kuzaana (tazama Muhtasari wa Maambukizi ya Virusi).
Maambukizi mengi ya virusi vya utotoni si makubwa na yanajumuisha magonjwa mbalimbali kama vile mafua, koo linalouma, kutapika na kuhara na homa inayoambatana na upele. Maambukizi mengine ya virusi ambayo husababisha magonjwa makubwa zaidi, kama vile surua, sasa hayapatikani sana kwa sababu ya kuenea kwa chanjo. (Kwa watu wazima, tazama pia Muhtasari wa Maambukizi ya Virusi.)
Maambukizi mengi ya virusi ni tofauti sana kiasi kwamba daktari anaweza kuyatambua kulingana na dalili zake. Kwa kawaida daktari hahitaji maabara ili kutambua virusi maalum vinavyohusika.
Maambukizi mengi ya virusi husababisha dalili kama vile homa na maumivu ya mwili au usumbufu. Ingawa watoto wengi walio na maambukizi ya virusi hupata nafuu bila matibabu, wakati mwingine madaktari hutibu dalili hizi kwa kutumia acetaminophen au ibuprofen. Aspirini haitolewi kwa watoto au vijana wenye dalili hizi kwa sababu huongeza hatari ya Ugonjwa wa Reye kwa walio na maambukizi fulani ya virusi. Antibiotiki haziwezi kuponya maambukizi ya virusi. Hata hivyo, kuna dawa za kuzuia virusi zinazopatikana kwa maambukizi machache ya virusi kama vile homa ya ini, baadhi yavirusi vya hepesi (herpesviruses), homa ya mafua na virusi vya UKIMWI (VVU).
Baadhi ya Maambukizi ya Virusi kwa Watoto Yanayosababisha Upele
Maambukizi | Kipindi cha kuatamiza* | Kipindi cha Kuambukiza† | Eneo la Vipele | Asili ya Vipele kwa Watoto |
|---|---|---|---|---|
Surua (rubeola) | Siku 7 hadi 14 | Kuanzia siku 2 hadi 4 kabla hadi siku 4 baada ya upele kutokea | Huanzia usoni karibu na masikio na upande wa shingo Huenea kwenye pingiti, mikono, viganja, nyayo, na miguu | Huanza siku chache baada ya homa na dalili nyingine na hudumu kwa siku 3 hadi 5 Nyekundu na tambarare, kisha huinuliwa na kuungana na kuwa maeneo makubwa mekundu Huwasha kidogo |
Rubela (surua ya Ujerumani) | Siku 14 hadi 21 | Kuanzia wiki 1 kabla hadi wiki 1 baada ya upele kutokea (Isipokuwa kwa watoto wachanga, ambao kwa kawaida huendelea kuambukiza kwa miezi mingi) | Huanzia usoni na shingoni Huenea kwenye pingiti, mikono na miguu | Huanza siku chache baada ya homa na dalili nyingine na hudumu kwa siku 3 hadi 5 Sawa na upele wa surua lakini si mwekundu kama huo na hauungani na kuunda maeneo makubwa mekundu |
Roseola infantum (exanthem subitum au pseudorubella) | Takriban siku 5 hadi 15 | Haijulikani | Huanzia kwenye pingiti, na kwa kawaida kuenea kwenye uso, mikono na miguu | Huanza ndani ya siku moja baada ya homa kali kupungua na hudumu hadi siku 3 Nyekundu na tambarare, haiwashi |
Erithema ya kuambukiza -Erythema infectiosum (ugonjwa wa tano au maambukizi ya parvovirus B19) | Siku 4 hadi 14 | Kuanzia kabla ya kuanza kwa upele hadi upele unapotokea | Huanzia kwenye mashavu ("mwonekano wa kofi") Huenea hadi mikononi, miguuni, na kwenye pingiti | Huanza siku chache baada ya homa na dalili zingine na hudumu kwa siku 5 hadi 10 Sehemu nyekundu, zilizoinuliwa, zenye madoa yenye mifumo ya kamba Inaweza kuwasha |
Tetekuwanga (varisela) | Siku 7 hadi 21 (kwa kawaida siku 14 hadi 16) | Siku 2 kabla ya upele kutokea hadi madoa yote yawe na ukoko | Huanzia usoni na kwenye pingiti Huenea kwenye mikono na miguu | Huanza siku 1 hadi 2 baada ya kuanza kwa homa na dalili zingine na hudumu kwa siku 4 hadi 7 Madoa madogo, mekundu ambayo huinuka na kuunda malengelenge yanayowasha sana, ya mviringo, ambayo kisha hufunika ganda |
* Kipindi cha kuatamiza ni idadi ya siku kati ya wakati mtu huambukizwa virusi (au vijidudu vingine vya maambukizi, kama vile bakteria) na wakati dalili huanza. | ||||
† Kipindi cha kuambukiza ni kipindi ambacho mtu ambaye ameambukizwa anaweza kueneza maambukizi kwa watu wengine. Maambukizi yanaweza kuenea wakati wa kipindi cha kuambukiza hata kama watu hawana dalili. | ||||
