Roseola infantum ni maambukizi ya virusi yanayoenea kwa urahisi kwa watoto wachanga au watoto wadogo sana, ambayo husababisha homa kali ikifuatiwa na upele.
Roseola infantum husababishwa na maambukizi ya virusi vya herpes vya binadamu namba 6 (human herpesvirus-6).
Dalili za kawaida ni pamoja na homa kali inayoanza ghafla, na wakati mwingine upele ambao hutokea baada ya halijoto ya mwili kurejea hali ya kawaida.
Utambuzi hufanywa kwa kuangalia dalili na umri wa mtoto.
Matibabu yanalenga kutuliza dalili.
Roseola infantum hutokea mwaka mzima, lakini mara nyingi zaidi wakati wa majira ya kuchipua na vuli. Wakati mwingine hutokea milipuko midogo katika maeneo fulani.
Chanzo kikuu cha roseola infantum ni herpesvirus-6, mojawapo ya virusi vya herpes vingi vya binadamu.
Watoto wengi wanaopata ugonjwa huu wana umri wa kati ya miezi 6 na miaka 3.
Roseola infantum huenezwa kwa kuvuta matone madogo ya majimaji yaliyotolewa na mtu aliyeambukizwa wakati akipumua. Matone hayo pia yanaweza kuvutwa wakati mtu aliyeambukizwa anapozungumza, kukohoa, au kupiga chafya. Ikiwa matone hayo yatatua kwenye nyuso za vitu na watoto wakavigusa kisha wakajigusa pua au mdomo, wanaweza kupata maambukizi. Maambukizi mara nyingi huenea kupitia kukaribiana na mtu mwenye virusi lakini asiye na dalili zozote, kama vile mwanafamilia. Haijulikani ni kipindi hasa ambapo watu huwa na uwezo wa kuambukiza wengine.
Mtu aliyewahi kuugua roseola infantum hujenga kinga na kwa kawaida hawezi kuambukizwa tena.
Dalili za Roseola Infantum
Dalili za roseola infantum huanza kuonekana takribani siku 5 hadi 15 baada ya kuambukizwa. Homa ya nyuzi joto 103 hadi 105 F (takribani nyuzi joto 39.5 hadi 40.5 C) huanza ghafla na kudumu kwa siku 3 hadi 5. Asilimia 5 hadi 15 ya watoto hupatwa na degedege kutokana na homa kali, hasa kwa sababu homa hiyo huanza na kupanda kwa kasi sana. Licha ya kuwa na homa kali, mtoto kwa kawaida huwa mchangamfu na mwenye nguvu.
Watoto wachache hupata mafua kidogo, koo kuwasha, au tumbo kuvurugika.
Tezi za limfu nyuma ya kichwa, kando ya shingo, na nyuma ya masikio zinaweza kuvimba.
Homa kwa kawaida hupungua haraka mnamo siku ya nne.
This photo shows the flat, red rash caused by roseola infantum.
Takribani asilimia 30 ya watoto wenye roseola infantum hupata upele ndani ya saa chache, au angalau ndani ya siku moja baada ya homa kushuka. Upele huo ni mwekundu na bapa (haukununa). Hutokea zaidi kwenye kifua na tumbo, na kwa kiasi kidogo usoni, mikononi, na miguuni. Upele huu hauwashi na unaweza kudumu kuanzia saa chache hadi siku 2.
Utambuzi wa Roseola Infantum
Tathmini ya daktari
Daktari hushuku roseola infantum pale dalili za kawaida (hasa kutokea kwa upele baada ya homa kali kwisha) zinapoonekana kwa mtoto mwenye umri wa miezi 6 hadi miaka 3.
Vipimo vya maabara hufanywa mara chache, lakini utambuzi wa roseola infantum unaweza kuthibitishwa kupitia vipimo vya damu.
Matibabu ya Roseola Infantum
Asetaminofeni au ibuprofen kwa ajili ya homa ili kupunguza usumbufu
Homa hutibiwa kwa kutumia asetaminofeni au ibuprofen.
Vifafaa na upele havihitaji matibabu yoyote maalum, lakini kwa sababu vinatisha, wazazi wengi humpeleka mtoto kwa daktari ili achunguzwe.
Ikiwa ugonjwa huu ni mkubwa kwa watoto wenye mfumo dhaifu wa kinga, madaktari wanaweza kuwatibu kwa dawa za kuzuia virusi kama foscarnet au ganciclovir.
