Ingawa kila uchungu wa uzazi na kuzaa ni tofauti, nyingi hufuata ruwaza ya jumla. Wakina mama wanaotarajia kujifungua wana uelewa wa jumla wa mabadiliko yatakayotokea kwenye mwili wao ili kuwezesha kujifungua mtoto na taratibu gani zitafuatwa ili kuwasaidia. Pia wana machagua kadhaa ya kufanya, kama vile endapo wanataka mtu wa kuwasaidia (kama vile mzazi mwingine wa mtoto) akiwepo na wapi pa kujifungulia.
Mazingira ya kujifungua mtoto yanatofautiana. Wanawake wanaweza kuwa na machaguo ya kujifungua hospitalini, kituo cha kujifungulia, au nyumbani.
Kujifungulia hospitalini kuna faida yake ya kuwa na wafanyakazi wa tiba a vifaa vilivyopo ikiwa matatizo yasiyotarajiwa yatatokea wakati wa uchungu wa uzazi na kujifungua au baada ya kujifungua. Mifano ya matatizo hayo hujumuisha kutokwa na damu nyingi kwenye uterasi wakati wa kujifungua, kupasuka kwa kondo la nyuma, dhiki ya kijusi, distosia ya mabega (bega la kijusi linakaa kwenye mfupa wa kinena, na mtoto anashikiliwa kwenye mfereji wa uzazi), haja ya dharura ya kujifungua wa upasuaji, au hali ya kutokuwa kawaida au dalili za dhiki kwa kichanga.
Vituo vya kujifungulia kwa kawaida vipo hospitalini au karibu na hospitali, ili kwamba huduma za dharura zinapatikana ikiwa inahitajika.
Baadhi ya wanawake wanachagua kujifungua nyumbani, na uchaguzi huu ni wakawaida sana kwenye nchi nyingi. Ikiwa mwanamke mjamzito anapanga kujifungulia nyumbani, anapaswa kuhakikisha kwamba anapata kiwango kilekile cha huduma za kabla ya kujifungua kutoka kwa mtaalamu wa huduma za afya kama wale wanaochagua kujifungua hospitalini au kwenye kituo cha kujifungulia. Anapaswa kuhakikisha pia kwamba hana matatizo yoyote au hatari kubwa ya matatizo inapofika karibu na wakati ambapo uchungu wa kujifungua utaanza. Kujifungulia nyumbani kunapaswa kuhudumiwa na mtoa huduma za afya mtaalamu mwenye mafunzo akiwa amefanya uratibu na hospitali na kuwe na mpango wa kuweza kwenda hospitalini ndani ya dakika 30 au chini ya hapo ikiwa kuna matatizo. Katika baadhi ya nchi, wataalamu wa afya waliothibitishwa (kama vile wakunga wa wauguzi waliothibitishwa) mara nyingi hawapatikani, na kujifungua kunasaidiwa na wakunga wasio na mafunzo au wakunga wa jadi.
Kwa wanawake wengi, uwepo wa wenzi wao, au mtu mwingine wa usaidizi, kama vile mtaalamu wa usaidizi kabla ya kujifungua, wakati wa uchungu wa kujifungua ni muhimu. Msaada wa kimaadili na kutia moyo huweza kupunguza wasiwasi.
Bila kujali machaguo ambayo mwanamke anafanya kuhusu wapi pa kujifungulia au aina ya kutuliza maumivu ya kutumia, kujua nini cha kutaajia husaidia kumwandaa kwa ajili ya uchungu wa kujifungua na kujifungua mtoto, kwa mfano, kwa kusoma kuhusu kuzaliwa kwa mtoto, kuzungumza na wanawake wengine na kuhudhuria madarasa ya maadalizi ya kujifungua. Madarasa ya elimu ya kujifungua mtoto yanaweza kuwaandaa wazazi kwa ajili ya uchungu wa kujifungua na kujifungua mtoto, zana za ufuatiliaji na matatizo yanayoweza kujitokeza.
(Angalia pia Matatizo ya Uchungu wa Kujifungua na Kujifungua Mtoto.)
