Katika ubadilishaji wa mishipa mikubwa uliorekebishwa wa kuzaliwa nao, miunganisho ya kawaida ya aota na ateri ya mapafu hubadilishwa, lakini vyumba vya chini vya moyo (ventrikali) pia hubadilishwa, hivyo "kurekebisha" mzunguko wa damu ili damu ya vena isiyo na oksijeni iingie kwenye mapafu na damu yenye oksijeni iende mwilini jinsi inavyopaswa. Hata hivyo, mzunguko wa damu haufanyi kazi vizuri kwa sababu ventrikali ya kulia, ambayo imeundwa kusukuma damu hadi kwenye mzunguko wa damu wenye shinikizo la chini kupitia mapafu, inahitajika kusukuma damu hadi kwenye mzunguko wa damu wenye shinikizo la juu zaidi kwenda mwilini.
Watoto wachanga walio na ubadilishaji wa mishipa mikubwa uliorekebishwa wa kuzaliwa nao huwa na dalili nyingi tofauti kwa sababu matatizo mengi ya ziada ya moyo hutokea pamoja na vyumba vya moyo vilivyobadilishwa.
Matatizo ya muda mrefu kutokana na kudhoofika kwa misuli ya moyo yanaweza kutokea katika utu uzima kutokana na ventrikali ya kulia kusambaza damu mwilini.
Utambuzi hulingana na matokeo kutoka kwa uchunguzi wa kimwili wa daktari, elektrokadiografia (ECG), picha ya kifua, na kuweka katheta moyoni.
Matibabu ni pamoja na dawa za kudhibiti dalili, upasuaji ili kurekebisha kasoro, na vifaa vya kurekebisha mapigo ya moyo (pacemaker) au vidhibiti vya moyo vinavyoweza kuingizwa ndani ikiwa kasoro hiyo husababisha mvumo usio wa kawaida wa moyo.
(Angalia pia Muhtasari wa Kasoro za Moyo.)
Ubadilishaji wa mishipa mikubwa uliorekebishwa wa kuzaliwa nao ni nadra sana. Watoto wengi walioathiriwa pia wana matatizo mengine ya moyo, kama vile kasoro ya septamu ya ventrikali, kuziba kwa mapafu na Ebstein isiyo ya kawaida.
Dalili
Kasoro hizi husababisha dalili mbalimbali. Mapigo ya moyo yasiyo ya kawaida yanaosababishwa na kizuizi cha moyo yanaweza kuibuka. Katika kizuizi cha moyo, ishara za umeme zinazodhibiti mapigo ya moyo huzuiwa kwa kiasi au kuzuiwa kikamilifu kati ya vyumba vya juu na vya chini vya moyo. Kizuizi cha moyo hutibiwa kwa kifaa cha kurekebisha mapigo ya moyo. Mbali na dalili zinazosababishwa na kasoro zozote zinazohusiana, watu wote walio na ubadilishaji wa mishipa mikubwa uliorekebishwa wa kuzaliwa nao wanaweza kupata dalili kufuatia kuwa na mzunguko wa damu mwilini unaosaidiwa na ventrikali ya kulia.
Watoto wachanga wanaweza kuwa na mvumo wa moyo kutokana na kuziba kwa mapafu au kasoro ya septamu ya ventrikali. Ikiwa kuziba ni kali na kasoro ya septamu ya ventrikali ipo, ngozi na midomo vinaweza kuonekana kuwa na rangi ya bluu (sainosisi) kwa sababu oksijeni haitoshi kufika kwenye tishu. Ikiwa kuna kasoro kubwa ya septamu ya ventrikali, dalili za moyo kushindwa kufanya kazi, kama vile ugumu wa kupumua na kunyonya vibaya, zinaweza kutokea. Dalili zinaweza kutokea polepole wakati wa utoto na ujana kulingana na ukali wa kasoro.
Watoto wanapofikia utu uzima, utendaji kazi wa ventrikali yao ya kulia, ambayo imechukua kazi ya ventrikali ya kushoto, unaweza kuanza kuwa mbaya zaidi, na kusababisha moyo kupanuka (ugonjwa wa misuli ya moyo (cardiomyopathy)) au moyo kushindwa kufanya kazi. Mara nyingi kasoro ya damu kurudi nyuma kwenye mshipa wenye ncha tatu hutokea, ambapo damu huvuja nyuma kupitia vali yenye ncha tatu kila wakati ambapo ventrikali ya kulia inapojikunja.
Utambuzi wa Ugonjwa
Uchunguzi wa moyo kwa kutumia stetoskopu
Elektrokadiografia (ECG) na eksirei ya kifua
Ekokadiografia (atrasonografia ya moyo)
Upigaji picha kwa mwangwi wa sumaku (MRI) na tomografia ya kompyuta (CT)
Uchunguzi wa mishipa ya moyo kwa kutumia katheta
Madaktari wanaweza kugundua matatizo ya moyo kwa kusikiliza kifua kwa kutumia stetoskopu. Madaktari wanaweza kusikia mvumo wa moyo au sauti za moyo zinaweza kuwa kubwa upande wa kulia zaidi ya upande wa kushoto. Baadaye, kwa kawaida hufanya ECG na uchunguzi wa upigaji picha.
Ekokadiografia (kipimo cha sonogrfia ya moyo) na, wakati mwingine, CT au MRI hutumika kuonyesha maelezo ya anatomia na kutathmini utendaji kazi wa ventrikali.
Elektrokadiografia (ECG) inaweza kuonyesha kizuizi cha moyo au kasoro nyingine, na eksirei za kifua huonyesha mabadiliko katika umbo na nafasi ya moyo.
Matibabu
Dawa
Upasuaji
Kifaa cha kurekebisha mapigo ya moyo au defaibrileta ya kidhibiti cha moyo inayoweza kuingizwa kwenye moyo
Dawa zinaweza kuhitajika ikiwa moyo utashindwa kufanya kazi.
Matibabu ya upasuaji mara nyingi ni muhimu kwa kasoro za ventrikali au kasoro ya damu kurudi nyuma kwenye mshipa wenye ncha tatu.
Huenda kifaa cha kurekebisha mapigo ya moyo au defaibrileta ya kidhibiti cha moyo inayoweza kuingizwa kwenye moyo zikahitajika ikiwa ubadilishaji wa mishipa mikubwa wa kuzaliwa nao utasababisha mapigo ya moyo yasiyo ya kawaida.
Ikiwa shida kubwa ya utendaji itatokea, huenda upandikizaji wa moyo ukahitajika.
Taarifa Zaidi
Nyenzo zifuatazo za lugha ya Kiingereza zinaweza kuwa muhimu. Tafadhali kumbuka kuwa Mwongozo hauwajibiki kwa maudhui ya nyenzo hizi.
Ushirika wa Masuala ya Moyo Nchini Marekani: Kasoro za Moyo za Kawaida: Hutoa muhtasari wa kasoro za kawaida za moyo za kuzaliwa kwa wazazi na walezi
Ushirika wa Masuala ya Moyo Nchini Marekani: Endokadaitisi Inayoambukizwa: Hutoa muhtasari wa endokadaitisi inayoambukizwa, ikijumuisha muhtasari wa matumizi ya dawa za kuua bakteria, kwa wagonjwa na walezi.
