Kasoro ya Ebstein ni hali isiyo ya kawaida ya vali ya yenye ncha tatu ambayo husababisha kasoro ya vali ya damu kurudi nyuma (damu inayovuja nyuma kwenye atiria) au kuziba (kuzuiwa kwa damu kutiririka kwenye ventrikali ya kulia). Upande wa kulia wa moyo unaweza kupanuka sana.
Dalili hulingana na umri wa mtoto wakati ambapo dalili zinaanza.
Mtoto mchanga anaweza kuwa na sianosisi (rangi ya bluu ya ngozi).
Mapigo ya moyo yasiyo kawaida yanaweza kutokea katika umri wowote.
Utambuzi hufanywa kwa kutumia elektrokadiografia (ECG) na upigaji picha wa moyo.
Matibabu ni kwa kutumia dawa na upasuaji.
(Angalia pia Muhtasari wa Kasoro za Moyo.)
Baadhi ya tafiti zimeonyesha hatari kubwa ya hali hii isiyo ya kawaida kwa watoto wachanga ambao mama zao walitumia dawa ya lithiamu wakati wa ujauzito. Kasoro ya septamu ya atiria, kuziba kwa vali ya mapafu na Ugonjwa wa Wolff-Parkinson-White mara nyingi hutokea pamoja na hali isiyo ya kawaida ya Ebstein.
Dalili za Kasoro ya Ebstein
Ngozi ya watoto wachanga inaweza kuwa na rangi ya bluu (kuonyesha mwili haupokei oksijeni ya kutosha), au dalili huenda zisionekane hadi utu uzima, wakati mapigo ya moyo yasiyo ya kawaida hutokea.
Utambuzi wa Ugonjwa wa Kasoro ya Ebstein
Ekokadiografia
MRI
Ekokadiografia (atrasonografia ya moyo) inathibitisha utambuzi.
Elektrocardiografia (ECG) na eksirei za kifua zinafanywa kwa kawaida.
Upigaji picha kwa mwangwi wa sumaku (MRI) hutoa maelezo muhimu ya ziada kuhusu vali yenye ncha tatu, ambayo huwasaidia madaktari kupanga upasuaji.
Matibabu ya Kasoro ya Ebstein
Dawa
Upasuaji
Dawa inahitajika wakati watoto wachanga wana ugonjwa mkali wa sianosisi. Dawa zinazoitwa prostaglandins zinaweza kutolewa ili kusaidia kuweka ductus arteriosus wazi ili kuruhusu ventrikali ya kulia kudumisha mtiririko wa damu hadi upasuaji utakapofanyika.
Ikiwa vali yenye ncha tatu isiyo ya kawaida husababisha dalili kali au upanuzi wa moyo, vali hiyo hurekebishwa kwa upasuaji.
Taarifa Zaidi
Nyenzo zifuatazo za lugha ya Kiingereza zinaweza kuwa muhimu. Tafadhali kumbuka kuwa Mwongozo hauwajibiki kwa maudhui ya nyenzo hizi.
Ushirika wa Masuala ya Moyo Nchini Marekani: Kasoro za Moyo za Kawaida: Hutoa muhtasari wa kasoro za kawaida za moyo za kuzaliwa kwa wazazi na walezi
Ushirika wa Masuala ya Moyo Nchini Marekani: Endokadaitisi Inayoambukizwa: Hutoa muhtasari wa endokadaitisi inayoambukizwa, ikijumuisha muhtasari wa matumizi ya dawa za kuua bakteria, kwa wagonjwa na walezi.
