Sababu kadhaa za kimwili na kihisia zinazohusiana na ujauzito na kujifungua zinaweza kuongeza uwezekano wa matatizo ya ngono.
Sababu za hatari kwa matatizo ya ngono yanayohusiana na ujauzito na baada ya kujifungua ni pamoja na:
Kiwewe wakati wa kujifungua: Kujifungua kwa upasuaji au kujifungua kwa kutumia koleo au kifaa cha kuvuta kwa utupu, episiotomia, au mipasuko katika eneo kati ya uwazi wa uke na mkundu (msamba) vinaweza kusababisha maumivu karibu na uwazi wa uke na kupunguza hamu ya ngono pamoja na uwezo wa kuamshwa kingono.
Kunyonyesha: Kwa sababu viwango vya estrojeni huwa vya chini wakati wa kunyonyesha, uke unaweza kukauka, na hivyo kufanya kujamiiana kusiwe kwa raha. Maumivu ya fupanyonga/ugonjwa wa kupenyeza yanaweza kuibuka.
Msongo wa kimawazo wa kisaikolojia na kijamii: Mabadiliko ya majukumu na mahusiano ya kifamilia, kuvurugika kwa usingizi, matatizo ya kiafya ya mtoto mchanga, na/au kuongezeka kwa uzito vinaweza kuongeza msongo wa mawazo.
Mfadhaiko baada ya kujifungua: Kuwa na mfadhaiko kunaweza kuchangia kuwa na matatizo ya ngono.
Ukatili wa mwenzi wa karibu: Ujauzito huongeza hatari ya ukatili wa mwenzi wa karibu, ikiwemo ukatili wa kimwili, kisaikolojia, na kingono. Ukatili katika uhusiano unaweza kudhoofisha kujiamini kwa mwanamke, kupunguza kujithamini, na kusababisha mfadhaiko, ugonjwa wa msongo wa mawazo baada ya kiwewe (PTSD), matatizo mengine ya kisaikolojia, na matatizo ya ngono.
Ikiwa tatizo la ngono, bila kujali aina yake, lilikuwepo kabla ya ujauzito, uwezekano wa kupata tatizo la ngono baada ya ujauzito huwa mkubwa zaidi.
Madaktari hutambua matatizo ya ngono yanayohusiana na ujauzito au baada ya kujifungua pale mwanamke anaporipoti matatizo yanayohusiana na kujamiiana wakati wa ujauzito au muda mfupi baada ya kujifungua.
Matibabu ya matatizo ya ngono yanayohusiana na ujauzito au baada ya kujifungua yanafanana na matibabu ya aina nyingine za matatizo ya ngono kwa wanawake. Kwa mfano, tiba za kisaikolojia na kujifunza jinsi mwili wa mwanamke hubadilika wakati wa ujauzito na baada ya kujifungua vinaweza kusaidia; ikiwemo kuelewa kama kujamiiana ni salama wakati wa ujauzito na ni mikao ipi inaweza kuwa ya kustarehesha zaidi (kwa mfano, kulala ubavuni). Madaktari wanaweza kupendekeza aina nyingine za shughuli za ngono badala ya kujamiiana kwa uke, kama vile kujisisimua, kukandwa, ngono ya mdomo, shughuli za kutanguliza ngono, kugusana kwa pamoja, kubusiana, mawazo ya kimapenzi, matumizi ya vifaa vya ngono, na kukumbatiana.
