Kwa kawaida, kile ambacho watu wenye pica hula hakiwadhuru, lakini wakati mwingine kile wanachokula husababisha matatizo, kama vile kuziba kwa njia ya mmeng'enyo wa chakula au sumu ya risasi.
Madaktari kwa kawaida hugundua pica wakati mtu mwenye umri wa zaidi ya miaka 2 amekuwa akila vitu ambavyo si chakula kwa mwezi mmoja au zaidi.
Mbinu za kurekebisha tabia zinaweza kusaidia, lakini habari chache zinajulikana kuhusu matibabu maalum ya pica.
Upungufu wa lishe na matatizo mengine hutibiwa inapohitajika.
Watu wenye pica hula vitu ambavyo si chakula mara kwa mara (kama vile karatasi, mfinyanzi, udongo, au nywele). Kwa sababu ambazo hazieleweki vizuri, pica inaweza pia kutokea wakati wa ujauzito na kwa watu walio na upungufu wa damu unaosababishwa na upungufu wa madini ya chuma. Kwa watoto walio chini ya umri wa miaka 2, tabia hii inachukuliwa kuwa ya kawaida kimaendeleo. Watoto wadogo mara nyingi huweka vitu visivyo vya chakula mdomoni mwao na wakati mwingine huvivila.
Katika baadhi ya sehemu za dunia, kula vitu ambavyo si chakula ni sehemu ya desturi za kitamaduni, kama vile tiba za jadi, ibada za kidini, au mazoea ya kawaida. Kwa mfano, baadhi ya watu katika Piedmont ya Georgia hula udongo wa mfinyanzi mara kwa mara kama sehemu ya desturi ya kitamaduni.
Kwa kawaida, kile ambacho watu wenye pica hula hakiwadhuru. Hata hivyo, wakati mwingine kile wanachokula husababisha matatizo, kama vile upungufu wa chuma na zinki , kuvimbiwa, vizuizi katika njia ya utumbo, sumu ya risasi (kutokana na kula vipande vya rangi), au maambukizi ya vimelea (kutokana na kula uchafu).
Pica yenyewe mara chache huingilia utendaji wa kijamii, lakini mara nyingi hutokea kwa watu wenye magonjwa mengine ya akili yanayoingilia utendaji wa kijamii. Matatizo haya ni pamoja na usonji, ulemavu wa kiakili na skizofrenia. Kumeza vitu kwa nia ya kujidhuru au kughushi ugonjwa (kama inavyotokea katika ugonjwa wa kujifanya mgonjwa unaoelekezwa kwa nafsi) hakuzingatiwi kama pica.
Utambuzi wa Pica
Tathmini ya daktari, kulingana na vigezo vya kawaida vya kisaikolojia
Vipimo vya kuangalia matatizo yanayoweza kutokea
Madaktari kwa kawaida hutambua pica kwa kubaini kile ambacho mtu huyo amekuwa akila.
Pica hutambuliwa wakati watu wanapoendelea kula vitu ambavyo si chakula kwa muda wa mwezi mmoja au zaidi. Ugonjwa huu hautambuliwi kwa watoto walio chini ya miaka 2 kwa sababu katika umri huo, kula vitu kama hivyo hakuzingatiwi kuwa jambo lisilo la kawaida. Pia haigunduliwi iwapo kula nyenzo kama hizo ni sehemu ya utamaduni wa mtu huyo.
Ikiwa madaktari wanashuku ugonjwa huo, wanatathmini hali ya lishe ili kuangalia kupungua uzito na upungufu wa virutubishi.
Wakati mwingine pica hugunduliwa wakati mtu ana dalili za kuziba kwa njia ya usagaji chakula (kama vile maumivu makali ya tumbo au kuvimbiwa) au za sumu ya risasi, na kupelekwa kwenye idara ya dharura au kwenda kumwona daktari.
Eksirei zinaweza kupigwa ili kuangalia kama kuna vizuizi kwenye njia ya mmeng'enyo wa chakula.
Madaktari wanaweza kufanya vipimo vya damu ili kuchunguza sumu ya risasi au vipimo vya kinyesi ili kuangalia maambukizi ya vimelea.
Matibabu ya Pica
Wakati mwingine urekebishaji wa tabia
Matibabu ya upungufu wa virutubisho na matatizo mengine
Mbinu za kurekebisha tabia zinaweza kusaidia, lakini kidogo kinachojulikana kuhusu matibabu mahususi ya ugonjwa huu. Mbinu za kurekebisha tabia huwasaidia watu kuacha tabia zisizofaa huku wakijifunza tabia mwafaka.
Upungufu wa virutubishi na matatizo mengine hutibiwa. Vizuizi katika njia ya chakula vinaweza kuhitaji upasuaji.
Pica inaweza kudumu kwa miezi kadhaa, kisha kutoweka yenyewe, hasa kwa watoto.
Taarifa Zaidi
Zifuatazo ni baadhi ya rasilimali za lugha ya Kiingereza ambazo zinaweza kuwa na usaidizi. Tafadhali kumbuka kuwa Mwongozo hauwajibiki kwa maudhui ya nyenzo hizi.
