Maambukizi ya kibofu cha mkojo (uvimbe wa kibofu cha mkojo) ni jambo la kawaida baada ya kujifungua mtoto. Maambukizi ya figo (pyelonephritis) yanaweza kutokea ikiwa bakteria wataenea kutoka kwenye kibofu hadi kwenye figo baada ya kujifungua.
Maambukizi ya kibofu na figo yanaweza kusababisha maumivu au kukojoa mara kwa mara na wakati mwingine homa.
Ili kutambua maambukizi ya kibofu cha mkojo na figo, madaktari huchunguza na kuchambua sampuli ya mkojo.
Kwa kawaida, wanawake hudungwa sindano ya viuavijasumu kwa maambukizi ya figo au za kumeza kwa maambukizi ya kibofu cha mkojo.
(Angalia pia Maambukizi Baada ya Kujifungua.)
Hatari ya kupata maambukizi ya kibofu cha mkojo huongezeka wakati katheta inapowekwa kwenye kibofu cha mkojo ili kupunguza mkusanyiko wa mkojo wakati na baada ya uchungu wa uzazi, hasa ikiwa katheta itaachwa mahali pake kwa muda.
Dalili
Maambukizi ya kibofu na figo mara nyingi husababisha maumivu au kukojoa mara kwa mara. Maambukizi ya figo na baadhi ya maambukizi ya kibofu husababisha homa. Maambukizi ya figo yanaweza kusababisha maumivu kwenye sehemu ya chini ya mgongo au upande na hisia ya jumla ya kuugua au usumbufu.
Utambuzi wa Ugonjwa
Kupima sampuli ya mkojo
Utambuzi wa maambukizi ya kibofu cha mkojo na figo unategemea kupima sampuli ya mkojo. Kwa maambukizi ya figo na baadhi ya maambukizi ya kibofu, sampuli inaweza kuhitaji ukuzaji wa bakteria kwa ajili ya uchunguzi ili kutambua bakteria.
Matibabu
Dawa za kuua bakteria
Kwa kawaida, wanawake hudungwa dawa ya viuavijasumu (kwa njia ya mishipa) kwa maambukizi ya figo au kwa mdomo kwa maambukizi ya kibofu.
Ikiwa hakuna ushahidi kwamba maambukizi ya kibofu cha mkojo yameenea hadi kwenye figo, viuavijasumu vinaweza kutolewa kwa siku chache tu. Ikiwa inashukiwa kuna maambukizi ya figo, viuavijasumu (kama vile seftriaxone pekee au ampicillin pamoja na gentamicin) hutolewa hadi mwanamke awe hajapata homa kwa saa 48. Mara nyingi, viuavijasumu hutolewa kwa mdomo kwa siku 7 hadi 14. Baada ya matokeo ya ukuzaji wa bakteria kupatikana, dawa ya viuavijasumu inaweza kubadilishwa kuwa ile yenye ufanisi zaidi dhidi ya bakteria waliopo.
Kunywa maji mengi husaidia figo kufanya kazi vizuri na kuondoa bakteria kwenye njia ya mkojo.
