Angiofibroma ya vijana ni uvimbe adimu usio wa kansa (tulivu) unaokua nyuma ya pua, katika eneo lilelile ambapo adenoidi zinapatikana.
Kuangalia Ndani ya Koo
Angiofibroma za vijana hutokea sana miongoni mwa kwa wavulana wa balehe. Uvimbe una mishipa mingi ya damu. Inaweza kukua polepole na kuenea hadi maeneo yanayozunguka ubongo na kwenye mmatundu ya macho.
Dalili za Angiofibroma ya Vijana
Kwa kawaida, uvimbe huo husababisha pua kuziba au maumivu ya kichwa, mara nyingi pamoja na kutokwa na damu puani, ambako wakati mwingine huwa kali sana. Uso unaweza kuvimba, au jicho linaweza kutoka nje. Uvimbe unaweza kuchomoza kutoka puani, au pua linaweza likaharibika umbo. Ikiwa uvimbe unakua polepole, watu wanaweza kuwa na dalili chache.
Utambuzi wa Angiofibroma ya Vijana
Tomografia ya kompyuta na upigaji picha wa mwangwi wa sumaku
Mara nyingi angiografia
Madaktari wanashuku utambuzi wa angiofibroma ya vijana kulingana na dalili.
Ili kuthibitisha ugonjwa, madaktari kwa kawaida hufanya vipimo vya upigaji picha vya tomografia ya kompyuta (CT) na upigaji picha wa mwangwi wa sumaku (MRI).
Kipimo kingine cha upigaji picha kinachoitwa angiografia (eksirei za mishipa ya damu zinazochukuliwa baada ya rangi kudungwa kwenye mishipa ili kuionyesha) mara nyingi hufanywa ili mishipa ya damu yenye uvimbe iweze kuziba (uzuiaji wa damu) kabla ya upasuaji, jambo ambalo hupunguza kuvuja damu.
Matibabu ya Angiofibroma ya Vijana
Kuondolewa kwa upasuaji na wakati mwingine tiba ya mionzi
Kawaida, uvimbe huondolewa kwa upasuaji.
Mara kwa mara, tiba ya mionzi pia hutumika, hasa ikiwa kuondolewa kabisa kwa uvimbe ni vigumu au haiwezekani au ikiwa uvimbe utatokea tena.
