Endokadaitisi inayoambukizwa

Endokadaitisi ni hali ya kuvimba kwa sehemu ya ndani ya moyo wako. Endokadaitisi inayoambukizwa ni:

• Maambukizi ya sehemu ya ndani ya moyo wako

Maambukizi yanaweza kuwa kwenye utando wa chemba ya moyo wako au kwenye vali za moyo wako.

• Endokadaitisi inayoambukizwa hutokea pale bakteria wanapoingia kwenye damu yako na kusafiri hadi kwenye moyo wako

• Endokadaitisi inayoambukizwa kimsingi hutokea kwenye tishu za moyo zenye kasoro, kwa mfano hutokea pale unapokuwa na kasoro ya kuzaliwa kwenye moyo au vali za moyo zilizoharibika, au ikiwa una vali ya moyo ya bandia

• Maambukizi yanaweza kuharibu vali za moyo hivyo kushindwa kufanya kazi vizuri na kusababisha moyo kushindwa kufanya kazi

• Madaktari hufanya vipimo vya damu na echocardiografia ili kuona kama una endokadaitisi inayoambukizwa

• Madaktari hutibu endokadaitisi inayoambikizwa kwa kutumia dawa za kuua bakteria na wakati mwingine kwa upasuaji wa moyo

• Ikiwa una vali ya moyo ya bandia au kasoro ya kuzaliwa katika moyo wako, unaweza kutakiwa kutumia dawa za kuua bakteria kabla ya upasuaji au tiba ya meno ili kuzuia endokadaitisi

Endokadaitisi inayoambukizwa husababishwa na bakteria au kuvu ambao huingia kwenye damu yako na kuasfiri hadi kwenye moyo wako. Bakteria wanaweza kuingia kwenye damu yako unapokuwa na:

• Maambukizi ya ngozi kama vile cellulitis au usaha wa ngozi

• Maambukizi ya njia ya mkojo

• Ugonjwa mbaya wa fizi

• Aina fulani za upasuaji au tiba ya meno

• Bomba lililochomekwa kwenye vena (IV) kwa muda mrefu

Una hatari kubwa ya kupata endokadaitisi inayoambukizwa kama:

• Ulizaliwa ukiwa na tatizo la moyo

• Una vali ya moyo yenye kasoro au iliyoharibika

• Kujidunga dawa za kulevya

• Una mfumo wa kingamwili ambao ni dhaifu

• Una vali ya moyo ya bandia, kifaa cha kurekebisha mapigo ya moyo, au kifaa cha kuamsha moyo uliosimama

• Umewahi kuwa na endokadaitisi inayoambukizwa hapo awali

Kwa kawaida endokadaitisi ya kuambukizwa huanza taratibu. Lakini wakati mwingine hutokea kwa ghafla.

Endokardaitisi ya kuambukizwa ya wastani hutokea pale endokadaitisi inapotokea taratibu, ikichukua wiki hadi miezi. Taratibu unapata dalili kama vile:

• Uchovu

• Homa ya chini (99° to 101° F or 37.2° to 38.3° C)

• Kupungua uzito

• Kutokwa jasho

Endokardaitisi kali ya kuambukizwa huanza ghafla, na unakuwa mgonjwa sana kwa haraka. Mojawapo ya vali za moyo wako inaweza kuharibika vibaya ndani ya siku chache. Dalili zinajumuisha:

• Homa kali (102° to 104° F or 38.9° to 40° C)

• Uchovu mwingi

• Ugumu wa kupumua

Ukiwa na aina yoyote ya endokadaitisi, unaweza pia kuwa na:

• Mzizimo

• Maumivu ya viungo

• Ngozi ya yenye rangi iliyofifia

• Viuvimbe uchungu chini ya ngozi yako

Wakati mwingine vitu vyenye maambukizi kutoka kwa moyo wako husambaa kupitia damu yako hadi sehemu zingine za mwili wako. Unaweza kupata maambukizi kwenye mapafu, ubongo, figo au ogani zako nyingine.

Madaktari hushuku uwepo wa endokadaitisi inayoambukizwa kutokana na dalili zako. Ili kuthibitisha, daktari atafanya:

• Ekokadiografia (kipimo cha picha kwa kutumia mawimbi ya sauti kwa moyo wako)

• Vipimo vya damu ili kutafuta bakteria

Madaktari hutibu endokadaitisi inayoambukizwa kwa kutumia:

• Dawa za kuua bakteria, zinazoingizwa kupitia vena (IV), kwa angalau wiki 2 na hadi wiki 8

• Wakati mwingine, upasuaji wa moyo ili kurekebisha au kurudishia vali ya moyo iliyoharibika

Ili kuzuia endokadaitisi inayoambukizwa:

• Usijidunge dawa za kulevya

• Tibu maambukizi kwa haraka

• Tunza vizuri meno na fizi zako

Ikiwa uko katika hatari kubwa ya kupata endokadaitisi inayoambukizwa, unapaswa kuwa makini sana na vitu hivi. Zaidi ya hayo, watu waliyo katika hatari kubwa wanaweza pia kutakiwa:

• Kumeza dawa za kuua bakteria kabla ya tiba fulani za meno au tiba kwa njia ya upasuaji ambazo zinaweza kuruhusu bakteria waingie kwenye mwili

Muulize daktari wako kama uko katika hatari kubwa.